الثلاثاء، 3 يوليو 2012

ابنك فى رمضان


 دى مشاركة من احد الامهات

ابنك من عمر سنتين لازم يحس برمضان ..اتجننتى ؟؟!! اخلية يصوم يعنى ؟؟لاء طبعا
بس لازم يعرف ان فية شىء مميز فى الوقت ده فية رمضان
اذاى بقى خليكى معايا
...الفترة دى بالنسبة لينا الكبار محبذ جدا الصيام وخصوصا اننا فى نصف الشهر
بالنسبة لى بدأت اربط ابنى لما يسألنى لية مش بتتغدى انتى بابا اقولة احنا صايميين ..طيب يعنى اية صايمين ؟يعنى مبنكلش ..لية؟علشان ربنا يحبنا بس كدا
ساعة قبل المغرب انادى علية واقوله لما المغرب يقول الله اكبر تعالى قولى علشان احط الفطار علشان نفطر واعمله طبق معانا حتى لو مأكلش واخلية يقعد معانا ويسمع دعاء الفطار

ليلة الرؤية حاولى تطلعى البلوكة وتقولى لابنك تعالى علشان نشوف هلال شهر رمضان طلع ولا لسة

طبعا مش هتشوفى حاجة ولا هلال ولا غيرة الموضوع مش بالبساطة دى بس الفكرة فى حد ذاتها ان نقوله ان فية شىء اسمه هلال رمضان

ونقوله فى وقتها تعالا نقول دعاء رؤية الهلال " اللَّهُمَّ أَهْلِلْهُ عَلَيْنَا بِالْيُمْنِ وَالْإِيمَانِ وَالسَّلَامَةِ وَالْإِسْلَامِ رَبِّي وَرَبُّكَ اللَّهُ"
فية كمان فكرة هايلة خلينا نتفق ان الطفل دنيتة اللعب والاصوات والاضاءة دى اللى بتفرحة ودى اللى بتعمله ربط بالحدث بشكل كبير

ماتيجوا نشترى النجوم المضيئة اللى بيجى فيها هلال ونجوم وفية منها لوب واشكال مختلفة –نفسى الاقى شكل فانوس- ونعلق النجوم والهلال فى الاوضة ونقوله بمفهوم بسيط ان ده هلال شهر رمضان وطبعا ممكن تنفيذ الفكرة على ورقة بيضاء حتى المهم ربط الفكرة فى رأسة بشىء ملموس ومحسوس لية

طبعا مش هاوصيكى الديسكتوب بتاعتك لازم يكون فيها صورة فانوس او هلال رمضان مع صورة الكعبة او حتى تكون مجموعه صور تتغير لان دى بتفرق مع عين الطفل يحس ان فية تغيير

من فترة قلت لكم على موضوع الدعاء مع الاطفال اقعدى فى وقت ليكى ولابنك دا لازم اصلا يكون يومى ان لية وقت خاص بيه معاكى فى وقتك ده قوليلة تعالى ندعى ربنا قول يارب وادعى باللى نفسك فية طبعا هيقول يارب شيكولاتة يارب لعبة عادى دى دنيتة وحاولى قدر المستطاع بعد شوية تجبيلة الحاجة اللى دعا بيها وتقوليله ربنا استجاب لدعائك ورزقك بكذا
بس دا يكون يوميا ف رمضان لازم تخلية يدعى ولو يقول يارب

برضو الاطفال يعنى لعب ولازم نكون مع العصر حاولى تدورى على العاب بسيطة للاطفال على الكمبيوتر تكون فيها بازل شكل فانوس فلاش فانوس بيغنى على الكمبيوتر


هتقوللى كدا بعدتى عن المعنى بالعكس المهم هو ربط الطفل بشىء كان حلو اسمة رمضان بحيث لما يكبر يكون فى ذهنة ان رمضان دا كان حلو اوى
يعنى وانا صغيرة مثلا كان فى رمضان لازم شوربة حروف عارفيناها اللى هى لسان عصفور وكل واحد منى انا واخواتى بيدور على حرفة ويأكلة بسرعه ونلعب
ولما كبرت شوية فى مرحلة 8 سنين مثلا ال فكراه انى كنت باخذ مصحف ذى بابا وماما وقرأ سورة يوسف بابا اللى كان يقولى لي تحديدا لانها قصة باستمر وباسأل فيها وهكذا

حاولى لو تقدرى لو بيجامة جديدة لابنك فى اول يوم رمضان بس يحس بالفرحة ولعبة صغيرة تقوليلوا هدية رمضان ولو كانت ب3جنية برضو هيفرح ويفتكرها
حاولى طبعا علشان الوقت تجيبى هدوم العيد من دلوقتى وبالتالى توفرى وقتك ف رمضان ودا هنتكلم عنه فى مكانه بأذن الله

لكن قولى لابنك ان رمضان لما يجى ماشى ربنا هيرزقك بهدية جديدة علشان دايما تبقى فاكار رمضان وكل لما يجى يلبس لبس العيد تفكرية بالمعنى ده

عارفيين ليا واحدة صحبتى ذكية اوى ربطت ابنها بالقرآن بشىء بسيط جدا كل لما ابنها يجى يبدأ فى سورة ف الحفظ او حتى يخلصها على حسب تجيب لعبة بسيطة ورخصية وتقوله اللعبة دى علشان حفظت سورة الضحى واللعب دى علشان سورة الزلزلة وهكذا ولما بيحب يلعب بل...عبة منهم بيقولها تعالى نلعب باللعبة اللى جبتهالى لما حفظت سورة العصر وهكذا الولد طبعا كل يوم عايز يحفظ ولو جيتى تشوفى هتلاقى الموضوع ماديا بسيط لكن معنويا بالنسبة للطفل كبير

 

حاولى كل يوم قبل النوم او خلال اليوم تحكى قصة عن الطفل الجميل ....اللى ربنا بيحبة اوى وبيرزقة بحاجات جميلة لانه صام رمضان ولأنة اعطى المساكيين

لما تعملى حاجة للجيران للفطار او السحور خلية يروح معاكى ويفهم ان ده علشان رمضان والرسول علية الصلاة والسلام بيأمرنا اننا نحب الجار بدون دخول فى تفاصيل مجرد اسس بس

بعد رؤيى الهلال بتدأ الاتصالات التلفونية والتهانى

اشركى ابنك فى الموضوع وقوليلة يقول لجدة وجدتة كل سنة وانتوا طيبيين بمناسبة رمضان
كررى على مسامعه دايما رمضان كريم... الله أكرم

اعملى فى اوضتة فانوس من ورق كاتون او حتى من ورق القص واللزق
خلية يحس بالفرحة اوى ف الشهر دة

حاولى برضو تقولى باصلى التراويح امامة طبعا يعنى كل الفاظنا توحى بتغيير بمناسبة شهر الخير
حاولى كدا لو غلط غلطة بسيطة تسامحية وتقوليلة هسامحك بس علشان احنا فى رمضان

كمان في رجاء كلنا طبعا هيكون عندنا بروجرام دينى عالى بأذن الله بأهداف واضحة وخطة ومرسومة بأذن الله لكن الياكى تنهرى طفلك علشان عايزة تقرأى قرآن او ده وقت الصلاة بهدوء حالوى فهمية لو اصر خدية على رجلك او اشغلية بكارتون بشىء بيحبة المهم ميحسش انك رفضاه حاليا بسبب العبادة بل بالعكس لازم يحس انك طيوبة جدا فى شهر رمضان
*************************************************************************************************

جازكى الله كل خير يا ايمان على مشاركتك الراااااااائعه وافكارك الجميله

0 التعليقات:

إرسال تعليق

Template by:

Free Blog Templates